Kad su prije stari ljudi zbetežali, perva pomoč im je bila brbijer. On je došel i pregledal človeka i mam je videl kej mu fali. Znal ga je pitati e li ima omamicu, e ga kej čez oči siječe, e li su mu noge žmehke i e li ga neke h trbuhu žlajfa.
Perva je bila na redu moja kumica Tereza. Hčem ju je videl, mam je je rekel: «Vam moram pustiti žilu od glave, a za tjedan dan vam moram dati jene trinajst rogov, jer ste jake pruntovni». I onda je brbijer Vojaković pustil žilu i kumica je mam omeglela. Hu tom je dotekla jena naša suseda, zgrabila ocet i rekla: «Jezuš, ljudi ima pak ne bume dali babe hmrijeti!» Macali sme ju po persa i po čelu i bile je je mam bolje. Kumica je stihoga otpirala oči, a brbijer nije bil nič strahu, jer on zna kej dela.
Onda je došel Pavel na red. Njemu je pustil žilu na ruke. Pavel je h ruka moral čverste držati žervenjak, a ščem je brbijer zasekel z sekalcem, kerv je špricnula i Pavel se složil naklu, a mi vudri kričati: «Jaj, jaj, hmerl bu». Onda nas je Vojaković se stiral van i rekel da tuj ne sme nišči biti nek betežnik. Mi berže na okne i dalje sme gledeli.
Ljudi su mam zeznali k tere hiže je došel brbijer i k njemu su išli kej da bi zvirali. On je pervi dan same puščal žile. Male teri betežnik je sam mogel iti dima, nek su njegvi morali dojti po njega s kravami ili su ga pak odnesli, jer su si betežniki bili slabi kej glive i bljedi kej kerpe. Kad je se zbavil, ljudi su se nekak odvljekli kak je teri mogel, a teri nije mogel nikam od slabosti, ti je je ostal ležati pri te hiže dok se nije male zmogel. A brbijer si je opral ruke i za stol.
Obed je bil kej na Božić ili Vuzem kad je tak pameten človek bil pri hiže. Jel je dosta, nu pil je same male i rekel je da dok se takef posel dela da se ne sme piti.
Drugi dan su došli na red same onije terem su se morali deti rogi. Mi sme se priredili kej je bile potrebne za roge. Bile je dosta tople vode h škafu ili paravnice, dosta rušic i stareh kaputov. Kulike sme god imeli lonce si su bili h peči puni vruče vode. Da sme i hižu jake stopili dojde brbijer s komore i pregleda vodu i veli da je hiža dosta topla i da bu počel.
Kumica Tereza je bila slaba još od žile, pak nije niti mogla sama zajti h škaf. Onda sme ju si pomagali deti f škaf,jer je ona bila baba prek stuo kil. Skere sa voda je zišla z škafca po hiže. Onda sme male po malu doljevali mlačnu vodu, jer se je morala male prije rogov odmočiti da bi se je kerv genula. Brbijer zeme van svoju torbu i štrumente i veli ženske:
«Vi ste jake pruntovna i moram vam dati šest rogov niske na križica i na saku nogu tri pod koljenem». I onda je počel. Imel je šest rožiče i oni su imeli sredi na strani jenu luknjicu. Ober te ljuknjice je bil nakeljen komadek kožice, tak da je pokrival. tu luknjicu.
Tije rogek je pritisnul na meste de je rekel da bu del roge i z čubami je čez tu luknjicu navljekel. Kad je odmeknul kožica se zaperla i rog se sam deržal i navljekel na tom mestu kerv. Onda je brbijer se te rožiče spomeknul i sake tuo okrugle meste na šest mest presekel i nazaj brže del roge gere i nazaj navljekel, tak da je cmerk vljekel kerv. Da se rog napunil kervi onda je sam opal saki po redu. Brbijer je bil vesel i rekel: «Bute vidli kak bute zutra ljehki». Dok je se bile gotove kumica je pak bila za nič i sa je drgetala. Stric Franc ju nam je pomogel deti van z škafa i del ju je na postelju. Na nju sme deli rušice i kapute i vanjkuš, ali je njoj bila same zima i zima. Skere je postelju poderla kak je drgetala. Berze sme zaklali kokoš i skuhali vina da sme ju male okrepili, i da je k sebe došla.
Hu tu vodu je išla mam druga baba. Njoj su rogi morali dojti na pleče i na ruke. Ona je bila fletnejša i gledela je van z škafa kej jahčerica. Eli su rogi i nju shasili, pak sme ju morali i prije van zejti neg su rogi bili gotovi. F hiže je bile vruče i se h kervi i ta je baba omeglela, pak sme ju berze deli k kumice na postelju i macali s octem i z rakiju. Komej i komej se je predramila i tak ih je bile jene par na postelje. Morale su poštene zašvicati. Onda su došli njihovi muži i donesli opravile i vina i pitali za račun brbijera. On je dosta skupe računal i skere sakomu mužu na strani rekel: «Čujte, vaša žejnska ima jake pokvarenu i prehlajenu kerv. Ona bu morala sake ljete redovite si dati roge metati». Za drugu veli da je jake pruntovna i tak za saku neke.
Babe su stihoga došle k sebe, onda su se obljekle i z mužmi dima. Da su još i doma odležale, bile su ljehke kej perce i znale su reči: «Ne daj Bog da bi več prešle ljete, a da si ne bi dale roge metati», i kak se pune bolje čutiju nek prije.
Tak se delale po hiža. A rogi su se metali i h toplicam. O tem, pak drugi put.