Spominal se moj otec, Štijef. Zapisane oko 1965.
IMBRA: Gda sam god otper ili zaper hižne vrate, moji su konji herzali; z njimi sam se čutil da živim i da nekej značim h svojem selu – i zate dok god morem i znam ne bi štel dati vojke z ruk …
ŠTIJEF: … tak govori Imbra pokljem trideset i pet ljet foringašenja, pokljem trideset i pet ljet muke i veselja z konji, nu več veselja, jer se hu njem htopila sa muka.
Z Imbru se nije moči spominati če človek nema rad konje, on o ničem niti ne zna govoriti nek o njimi. On je kak mlada mati tera pod milem Bogem ne zna nič druge povijedati nek kak je njejne dijete rekle ove ili one, da je pojele ili nije pojele obročec, da je betežne ili pak fala Bogu nije.
Vojke, kuole i konji: te su tri stvari od tere je počel Imbrin svijet i oko tere se vrti on več pune trideset i pet ljet.
Nišči ne zna kuljike je ljet mogel imeti dečarec gda su mu se pervi put konji dopali, ne zna te niti on sam; zna same da je te bile još negda h perve mladosti, tak daljeke da je več zdej i čiste meglene i nije se moči zmisljiti. Gdo bi i znal kak je počele foringašenje, one perve gda još nije bile kuol niti konje, one gda je se još bile same h zraku, h mislimi, gda pred ocem nije smel niti pisnuti o foringe, a kamoli da bi nucal kakvu pripomoč kej bi si zrihtal zredu.
IMBRA: Dopadali su mi se od malosti. Gda sam god videl gde na sejmu ili na cesti ljepe konje, sam si znal misliti kak bi i ja do njih došel. Prije soldačije nije se do toga nikak i nikak mogle. Otec jim nije dal glasa čujti. Nu gda sam si h soldačije pri tišljare zaslužil ljepe penes i još k tomu posudil od svaka, onda se je več dale nekaj napraviti. Žrebica teru sam kupil bila je najljepša i najhujša h cijelom kotaru. Pokljem je išle lježeše. Dale se zaslužiti, spremeniti konje, zrihtati zredu, dati konjem kej je spada …
ŠTIJEF: Kak je bile lježeše pokljem, teške je zmisljiti. Jer pokljem pervoga veselja z foringu, pokljem perve foringe h Zagreb ili pak h Sloveniju, onda gda je več postal človek na glasu h svojemu selu, pokljem sega toga je došel – rat.
IMBRA: A kaj sam mogel: Sam moral iti! Nije se pitale. Vozil sam betežne k doktorem, matrijal ovakef i onakef, kej kakve stvari sem prevažal; hu tu dobu se nije mogle spričati. Bil sam splašen kej me ne bi potirali z suobu prema severu, od hiže – i išel sam sikam kam je bile za iti. Jemput sam bil zapal h gerdi red: h Mihaljekovom jarku su me bilji zaprli i nikak pustiti dima. Onda su se našli dva soldati teri su kakti morali na me paziti, a mam su me drugi dan poskrivečki pustili dima. Su sigurne i oni doma imeli konje i zredu pak su znali kej te znači biti s konji h ratnu dobu h takvom redu.
ŠTIJEF: Nu, i če je rat trajal duge, kej da traje stuo ljet, sejene je minul. Pokljem je bile morati skerbeti i delati več nek kej da je se zgorele ili poplavele. Ničesara nije bile, a sega je bile trijeba …
IMBRA: Hude je bile! Denes več nije moči zmisljiti da je tak bile. I se sme te prežili – i pozabili. Nišči se več ne zmisli kak se je mogle podeljiti četiristo kil kruha na šesto ljudi. Ja sam imel fljetne kolce i konjiče i dogovoril se z ljudmi da bum saki dan dopeljal kuole kruha z Krapine h Sveti Kriš. Konji su bili slabi, kerma slaba, zobi nič … Jene sam konjče ostavljal h Vijesi, a z drugem išel h grad po kruh. Naklal sem i onda stal k ručice. Rijeval sam i tak pomagal peljati. Onda sam h Vijesi pripregel i drugu kobilicu i dopeljal kruh.
Nu, stopre onda je počele: grijeh, kletva, gužva, krič … « Zakej nijesi još dopeljal!» «Kej bume dece doma dali jesti!» Kleli su i mene i cijeli svijet. A je, kej sam mogel? Sam razdeljil kruh i vugnul se.
H brege nije bile moči iti z kuolami. Konji su bili slabi i zmučeni. Ostavljal sam je pri jenomu susedu i pešice išel dima. I putem zel štrucu teru sam si spravil za svoju decu. Na pijacu bi bil ostal bez nje: bili bi mi ju z ruk zeli. Jemput su me bili pozvali da naj platim porez na prevoz. Misljil sam si, respete bogme, ne bum platil poreza na takef prevoz. I nijesam se dal potrijeti! Sam tak duge hodil na opčinu, dok mi nijesu dali mira.
ŠTIJEF: Jedini foringaš k selu – te je bila i čast i dika. Nu zate se je pune put morale potegnuti več neg drugi. Morale se iti i ne pitajuč e bu ti gda te plačene ili vernjene.
IMBRA: Je, sused je znal doteči: «Skoči, pomozi, otpeljaj!» A kej sam mogel! Sam nije mogel ostaviti človeka i ne mu pomoči! Zapregel sam zmučene i lačne konje, sel na kučiju ili na kuole i prešel. Nije bile za čakati. Znali su mi dopeljati prestreljene muže, malu decu tera su pijuhkala kaj čučeki. Smilošča jih je bile za videti. Stuo put sam peljal babe h porodu. Zlo je kad ti po kmice i h blatu, negde daljeke od mesta kriči kej tič h pruglu. A ti je nič nemreš pomoči. Nije za peljati od deža ili blata ili gerdoga reda, za nesti nije, a nekej se muora napraviti. Blate je znale biti konjem do terbuha, a ja sam tiral i tiral i misljil: Bum došel na vrijeme do doktora, če buju kobile glji pocerkale. Najgorše je bile gda sam odnekud došel i truden legel, a za puol vure kuči nešči po oknu, a vunje hljijeva dež kej da bi batine z zraka rijeval. Onda se je bile najteže stati. Moja je Štefa znala reči: «Nije ga doma, najte kučiti, počakajte ga … « Nu ja se nijesam dal čakati, sam se opravil i išel.
Nu nijesu mi te, fala Bogu, pozabili. Hnogi su si zapamtili kej sam im napravil. I zate gda zdej dojdem gere, h svoje sele, sam doma pri sake hiže. Saki me rade vidi i prime. Pri sakom si morem spraviti kuole i blage, pri sakom počinuti, če imam čas. Zdej je gere jake ljepe. I ne mrem pozabiti zakej sam im onda znal biti tern h oku.
ŠTIJEF: Daval si se na saku foru, blizu ili dalječnu. Nije te bile strah iti po zime i zmerzavice, zmučiti i prehladiti konje …
IMBRA: Zate je trebale imeti sposobne blage. Nije te mogel iti gdoj bi se god bil zmislil. Do Zagreba mi nije bile nič prejti. Ili do Varažljina. Nu, sejene je zaistinu znale biti gerde. Jemput … bila je zima tak huda kej su pri Kersnike verbe pucale, snijeg veljiki i tak zmeržnjene kej da več nikdar ne bu vuletja. Nišči se drugi nije dal i došlji su po me. Naklal sem osem hekte vina i nijesam stal nikdar prije Zagreba. Hvečer sam došel delje, sklal vine i cijelu nuoč bil s blagem h jene suše. H jutre nazaj dima.
Zima je bila huda kakvu nikdar nijesam prije niti pokljem zaštimal. Sam mislil da buju mi vuhe otpale. I sejene sam zbavil posel i zaslužil svoju plaču.
ŠTIJEF: Delal si tuljike ljet. Vozil si kej kakve ljudi. I one bolje: doktore, veterinare, pope …
IMBRA: Ja, ja, h tuljika ljeta se je kej česa mogle doživeti, z hnogi ljudije biti. Stuo i stuo put sam znal biti zamotan h jenom gunjčeku skup s gosponem. Sme se stisnuli i peljali gde je več bile trijeba pomoči. Pamtim kak je veterinar znal biti strogi i male oštreši gospon. Pred župnikom sam imel največ zorta. Nu, naš je pokojni župnik bil dober kej kruh. Gda je videl da konji teške vlječeju h brijeg, je rekel: «Hodi, Imbra, idemo delje. Buju ti konji preveč zašvicalji, pak si je moreš prehladiti». I čiste je bil onak, kak domači, se si se mogel z njim pospominati, navjek je človeku dal dobroga navuka. Več mi se vidi stuo ljet kej ga nije.
I kej kakve doktore sam vuozil. Nje največ. Z njimi sam bil kak pajdaš. Bil je jen kakvoga več ne bu nikdar. Navjek za šalu, spominjek, paradu. Bil je malji i debelji i okruglji, glji onakef kakvi gosponi jesu. A nikdar se nije sramil niti vugibal maloga človeka, zate ga i imam rad. I djen denes gda se zestaneme ide z daljekoga k mene pak se pozdravime i navjek me pita kak sam je, kak mi ide, e bum na hitrom zmenil konje … Te mi je praf drage. Vračil je hnoge i hnoge moje Komorščane i za sakem je tak postupal kej da mu je rojeni brat, elji pak gdoj drugi z familije.
ŠTIJEF: Kije nije bile i veselja hu tom sem skupa, ne bi se niti bile mogle zderžati. A veselje se je znale stvoriti na perjačehe, na zabave, na Bistrice, h topljica … sigde gde si bil z svoju zredu.
IMBRA: Navjek me srce vljekle za prejti med ljudi, nekam dalje od svojega sela … Znal sam ljepe popijevati i huškati. Več bi me same zbog toga bili zeli za foringaša, a kamolji ne zbog moje kučije i konje teri su bili živi kej strijele. Gda je počela sezona proščenja, sam nije imel mira niti dana. Po mesec dan prije sme se spravljali. Dohajali su k mene zvjedat gdoj bu je vuozil, gde buju sedeli, gdoj bu kej popijeval, h teru vrijet se bu genule. Se sam znal zrihtati: i gde bume stalji i gda bume kretalji, gde bume konje ostavili na Bistrice h suše. I tak sam se pokljem, gda je se dobre zgotovile, čutil kak človek, skere kak gospon.
Hnogi put sam vuozil mlade na kej kakve zabave i veseljice. Te je teška foringa. Tuj se ide med mlađariju tera te neče niti platiti kak spada, a more te još nazadnjič «načesati» z kakvu botu, prerezati štrajnjge ili pak odrezati konjem repe. Za takve je stvari moral biti bikovec pod zicem i štoljijet h žepu. Ja sam sijedel na svojem mestu naprije i tiral, a oni su odzadi najprije mudre mučalji, a onda su počeli đimburiti, smejati se, popijevati i tak prek do gostione ili zadružnoga doma gde je več bila zabava. Največ put su me naručili kej sam je i dima vozil, pak sam je onda čakal. I bil z njimi raven i pesme i h veselju i h pijače. Nijesam im se dal pod noge. Naj znaju da Komorščani nijesu babe, da su oni dečki za pesmu i veselje. H takve sam si priljike znal misljiti kak ja nijesam nikdar za svoje mladosti imel priljiku tak se poveseljiti kak ovije denes. Kad sam ja mogel iti z svoju Štefu? Doma je navjek bile posla i drobne dece. Ona je kraj mene ostala veljika sirota. Čuvala je doma one siromaštve kej sme imeli i strahuvala za me gda bum došel i kej mi se ne bi kej zgodile. A onda gda sam došel, onda je pospravljala konje i berze priredila jesti. Ja sam navjek bil hbit od posla; ona si krej mene nije do zdej hžila nikakvoga dobra. Nu, gda bum jemput zbavil se posle i gda bum zrihtal se f hiže i oko hiže, onda si bu i ona mogla počinuti.
ŠTIJEF: I če je h Komoru znale biti ljepe i vesele, i če si gere imel i grunt i stanje, kak je te zišle da si se sejene odlučil prejti od toga sega i znovič se naseljiti tuj, pri ceste, h mestu…
IMBRA: Gduo kej mene more? Gdo more kej mojem konjem? Ne mre mene hništiti nikakva konkurencija. Ja imam posla i tuj kuljike očem; još i več. Oni imaju ljetrike i traktore, imaju se kej očeju, a k mene se hodiju splakijevat gda je trijeba otpeljati na brijeg. Onda sam dober: «Hodi, Imbra, spasi stvar, otpeljaj. Matrijal mora biti gere, a z avtem nije moči zvlječi». I tak ja zvažam stvari za njihove kljeti i vikendice po brijege, a zaračunam si kak me ide. Gda su me naručili naj me i platiju.
Nijesam ja več onije kakef sam došel sim delje h Sveti Kriš. Onda sam ja tekel pomoči sakomu ibogomu susedu ščem je ovije rekel «A». Jemput sam rekel «Štop!» Ne bu te tak dalje išle. Trebal sam delati hižu, štalu, kuočak, školati decu, a oni su misljili da je došel siromak i bedak teri bu njim zabadaf robuval. Perve sam ljete popuščal, nu pokljem več ne. Zdej ne prežem konje če nijesam siguren da bu mi plačene na vrijeme, a merti i naprije. Se oko mene je kej kakve gospočine; oni imaju avte i televizore, a ja bi naj cuznil zabadaf. Ili naj platiju ili bum rajši spal. Šezdeset i pet ljet je bile dosta. Kuljike penes, tuljike i mužike i Bog! Ja sam štel kej bi se mi susedi med suobo pomagali. Nu oni nijesu šteli znati da konji koštaju. Da je morati platiti i sijeno, i zuob i kôv … A če je mene kej trijeba, onda njih nije doma. Ne mre se tak! Mora se človek sam na se osloniti. Mene oni trebaju saki dan. Šuder, pijesek, vuglen, sijene, slama, se su te moje stvari. Se te ja napravim. Ja moram osigurati nekej sebe i svoje dece. Nema penzije, niti ju nem dobil nikdar. Zate moram nekej stvoriti z čem bum zderžal do kraja.
ŠTIJEF: Nu vremena su se premenile. Na bolje su se zmenile. Zdej več nije morati glji se tak jake mučiti. Bi se mogel male počinuti, odehnuti nakon tuljike ljet …
IMBRA: Ne morem si ja još počinuti. Bum več! Zdej sam još navjek potrijeben. I kraj službe sina i snehe, ja još furt nosim f hižu. Oni su mladi ljudi i se kej zaslužiju treba njim. Ja još navijek moram nje pomagati, a ne oni mene. Teške je računati da te bu nešči zderžaval. Moj me dinar veselji makar je on i teške zaslužen. I kak bi ja pustil konje i foringu? Kej bi pak onda delal? Im ne bi znal kam bi z suobu gda bi došel h štalu, a njih ne bi nutre bile. Oni su mi se na svijetu. Kak deca, kak sini. Mi se razmeme i pomažeme med suobu. Gda kupim štrucu kruha, ja tergam njim kak i sebe. Oni heržeju od veselja gda me vidiju, oni me več čutiju po koraku. Ne daj Bog da bi moral dati vojke z ruk. Im bi oni pocerkalji bez mene, bokci. Če bi ja i kruha stradal, za nje bi se navijek našle. Zdej im h zadnje vrijeme imam kej dati i ne šparam pri njihove prihrambe. Nu, naj im bu. Oni su mi zdej dobri i jahki. I kuljike su god oni jači, tuljike sam ja slabeši.
Nu, ne dam se, sejene. Još furt sam ja dečke teri more kej česa zderžati. Još furt ljudi nucaju mene i moje konje. A dok je toga, onda se ne mre prepasti. I dok me nucaju, ne mrem se ostaviti foringe. Saki čas se pritrefiju nove prilike za posel, dojdeju novi poslji. Bi bila grehota ostaviti se toga h takvu dobu.
ŠTIJEF: Tak Imbra velji pokljem tuljike ljet foringašenja. Tak velji i jača se sam z temi svojemi riječi; jer nije istina da je on još furt dečke teri bi mogel tak pune toga zderžati. Te se njemu same vidi pokljem sega onoga kej je za istinu zderžal. Za tri ljete bu imel pune sedamdeset; če je i serce mlade, hu ta su ljeta se slabeše ruke i kotrige. A one su najvažnejše za dele.
On more još furt spiti i pojesti i napraviti, nu sejene je nekak bljizu da več ne mogel. I če bi, ne daj Bog, opal h postelju, te bu mu pune težeše nek onem teri nemaju foringu. Njemu nej bile moči ležati, a ne plavati z svojemi sivci po jarke i po brijege. Zate niti nije bile v redu kej sme mu reklji da bi bile dobre prodati konje i počinuti se. Kak bi si on počival bez njih. Jer, sake one jutre gda dojde k njim h štalu i hiti im plast sijena, saki onije dan gda on nje spelja van po poslu, saki onije večer da skup dojdeju dima trudni i zmučeni, saki je takef dan za njega – pravi počinek.
Foto: Marijan Zanoški, Foringaš u šumi, ulje na staklu.