FOTO:Fotografija (razglednica) koju je soldat Andrija Franc poslao za svog sina Ivana iz Innburga, 24. rujna 1915. godine s bojišnice I. svjetskoga rata iz kojeg se nije vratio. On na slici stoji treći s desna na lijevo. Obiteljski foto arhiv Z. Franc.
JA: Dober večer, kum!
M. VEČEK: Bog daj sreču!
JA: Ružite koruzu? Sam došla … Nu fala, fala, bum si sela. Im bute sejene spali, kej ne? … Najte mi punu kupicu natakati, kumica! … Fala, bi same probala te vaše dobre vine!
M. VEČEK: I koružnjaka?
JA: Eli same tjenku šniticu. Gli za požmahati! Fala na pitanju, doma su si zdravi, djelaju, kak navjek … Jake vam je fine vine, jake fine! Bum vam pomogla ružiti, kum!
M. VEČEK: Zakaj ne.
JA: Bum si sela k vam.
M. VEČEK: Tak, same se prislonete k peči kej vam ne od vrat puhale po križice! JA: Je zima, kum … Tak bi rada znati se te male i veljike stvari od vaše najranejše mladosti do denes. Vi ste rojeni h jene siromašne hiže. Da ste počeli pamtiti: kuljike ste imeli zemlje, z kem ste živeli f hiže, kak se živele hu tu dobu da ste vi bili mladi?
M. VEČEK: H moje mladosti? Jas takorekuć male pamtim da mi je otec bil betežen. Pamtim same tuljike da je te bile na Tri Kralje h večer. On je došel od večernjice i glji je z stricem Blažem pil pri dedeku. Niti ne znam kej su pili. I najemput po noči zlo i zlo, takve zlo da je bile čiste da bu hmer. Nu do jutra je zlo sejene minule. Drugi den je več ružil koruzu, te znam kej da je bile denes. Još je bila došla i babica i djelala z njega bedake, šaljili su se i ona mu je rekla: «Jahal te hudič, snečke si skere hmer, a zdej komedije spravljaš!» No otec je ostal kriplin šest ljet. Pokljem toga je bil dan i noč betežen, sikut ga je boljele, bil je h špitalu, hodil je i nekam gere h Sloveniju k doktoru – i nič bolje. Da je minule šest ljet, potrošil je i zadnje peneze, prodal i zadnju kravu i z nju sme ga pospravili. Od nje je ostale dvanaest forinte. Gda je on hmer ja sam išel h školu, e li ti ne znam prav reči e li h pervi e li h drugi razred.
JA: Kakve su bile prilike pri vas hu tu dobu?
M. VEČEK: Nas je bile četvere dece, jene djete je gli hu tom toga bile hmerle. Borme ti niti ne znam kak je detetu bile ime, znam same da je bila sestra, pucka. Da je hmerla, mati ju je zamotala i odnesla k vujcu naj ju on zakopa. Tak nas je ostale troje. Jen brat je te ljete hmer. Ostavil je jenu čer h Zagrebu oženjenu i zeta, a h Belovaru je imel sina nameštenoga na kotaru. A te ljete je bila i mati zbetežala … Te ti je se skup bile zlo … Da sam ja male odrasel, onda sam, znaš, onda sam se počel potepati. Išel sam sikut okol, nu največ gere k Biškupu. Pri njih je navjek bile pune ljudi i sakomu su dali jesti i piti. Pokljem sam prešel h rudnik h Mađarsku. Mogel sam imeti oko petnajst ljet.
JA: Kak je došle do toga da ste išli h rudnik h Mađarsku? Kej nije vlast priječila da tak mladi ljudi djelaju h rudniku?
M. VEČEK: Nu, ja, z Mađarske je sake ljete došel jen agent teri nas je pobiral i tam otpeljal. A vlast nije nič priječila, čiste nič. Niti si trebal imeti pašijuš, niti dokumente, same si prešel.
JA: E li su vam dali kakvu garanciju da bute tam imeli stan i hranu i posel?
M. VEČEK: Se, se ti je tam bile dobre, bolje neke doma.
JA: I kak vam je bile ostaviti mater i braču i iti h rudnik?
M. VEČEK: Nije bile tak teške. Mi sme bili bokci. Pri mene doma se nije nikdar kruh pekel. Nije bile dropte začina, zerna soli, ničesara … Tak se je živele … tak …
JA: I kak vam je bile da ste došli h rudnik? E ste se mam namerili na dober posel?
M. VEČEK: Je je, bile je dobre. Pervi put nijesam bil duge … jene par mesece i onda sam prešel. Da sam došel drugi put, dobil sam veču plaču i kakti viši rang posla. Onda sam tak dobre služil da sam saki mesec zaslužil čistu kravu. Nikdar mi nije došle menje od 55 forinte, menje ne, če ne več.
JA: Kej ste si mogli kupiti za jen forint?
M. VEČEK: Hm, dvije najbolše rubače. Jen forint je vrijedel kak denes tri hiljadarke. Forint je imel 10 zekserof, a jen zekser je bil 20 filjerof. Te ti je bila veljika zmešarija z penezi, kak i zdej da su bili došlji dinari, a još su bili ostali forinti. Drugi put sam ostal duže vremena h rudniku. Tam nijesam nikdar jel samoga kruha, nek sam si ga mazal h mastju. Nikdar nijesam krumpijera kuhal k vode, neke h masti. I žgance glji tak. I onda sam saki čas fasuval ili rubaču ili lajbec ili hlače ili kaput. I te nam se se apcigale. Dosti male su nam apcigali i onu babu tera nam je h jutre došla pozmesti i zakuriti. I još sam furt dobil za čistu kravu van.
JA: Zakej Mađari nijesu delali h rudnike? Kej su oni delali bolje posle ili pak nije bile ljudi?
M. VEČEK: Nije ih bile, ljudi je faljele …
JA: I kak su oni hu te vrijeme živeli h gradu … na selu …?
M. VEČEK: Ljepe, ljepe. Pune bolje neke mi doma. Siječam se da sam išel dima kak sam znal gledeti dimnjake, fabrike … A pri nas nič. Nijesi mogel posla dobiti. Napravili sme Beč, napravili sme Peštu … i tak … nam nič.
JA: Vi ste išli tam same prije vojske, kej ne?
M. VEČEK: Tak je, tak. Pazi, ja sam predi neke sam išel h vojsku zrigolal te tersje tere i denes imam. Znal sam delati do terde kmice, dok sam mogel. Onda sam prešel f hižu k Štijefu. Tam sam se zmešal med težake i pojel če su oni kej ostavili. Jer doma nije bile kej jesti.
JA: Vi ste tak več prije vojske imeli nekej svojega?
M. VEČEK: Je, ja sam te tersije napravil i one me je spasile. Tuj ti je bile kamena i lapora da te Bog oslobodi. Z toga kamena je napravljena Jankova klijet gere na brijegu, a na sto i sto košef sme ga znosili h Kosovu jamu. I nikdar ga nijesme znosili proč. Još ga ima i denes. Prekapali sme ga. Nije bile gnoja pak sme z huste nosili zemlju na teru sme sadili ters. Nu da sam došel z vojske, ja sam bral hu tom tersju največ h cijelom selu. Onda sam znal nabrati 22 hekte. Jemput sam bral i 30 hektof. Onda sam prodaval vine i navjek sam postigel najbolju cenu, jer bi si bili radi od mene kupili.
JA: Gda ste išli h vojsku kader služit?
M. VEČEK: 1909. Bil sam h pešadije. Tri ljete h 53. regimente. Četiri kompanije su bile jen bataljon. Tri bataljoni su bili h Zagrebu, a jen h Bosne. Te je se skup bila 53. regimenta. Od regimente je bila veča brigada, od nje divizija i od nje korpus. General Gernbaj je bil korpuskomandant. Korpus je imel sedište h Zagrebu.
JA: Gda ste 1912. išli z vojske, e se je kej čule da bi mogle biti rata, ili nije bile nikakvoga glasa?
M. VEČEK: Nič, nič, nu mam druge ljete su nas nazaj pozvali h vojsku. I tak sam ja dočakal rat več h vojske.
JA: Kak je te bile gda je bil objavljen rat?
M. VEČEK: Mi sme mam bili odrejeni za front. Najprije sme išli h Serbiju. Imeli sme svoje posebne horvacke jedinice i komandante. Nu, mi nijesme mogli dobre napredovati, jer se neke čule da nas je komandant izdal i on je mam moral iti h penziju. Nekej nije štimale, nu mi nikdar nijesme znali kej je praf za praf bile. Zate su k nam bili porinuli Nemce. Ja sam bil ranjen 5. prosinca i moral sam prejti i poklje več nijesam išel na front. Ja sam još bil h Serbije gda se navjestil rat na ruskom frontu. I gda sme bježali z Serbije van, došlji sme h Bjeljinu i tam sme se zestali z domačemi dečki. Jen dan sme tak debatijerali i niti nijesme bili do kraja gotovi, več nam je na befelu čital da je Rusija navjestila rat. Nem nikdar pozabil kak sme bili na Kolubare vode. Bila je tam takva bitka da nije bile moči goršu zmisliti. Natirali sme vojsku kej je bježala kej stekla. Onda je najemput zišla zapoved da sme morali zajti h samu vodu i tam stati kej nas nije mogel potrefiti z mašingeverem. Onda je jemput dedek Maks, teri je kre mene stal rekel da je žejen. A kapetan mu je odgovoril da je sramota za cuksifirera teri stoji h vode reči da je žejen. A nam se sijem durila voda, jer je bila sa krvava i hu nje je bile sto i sto mertve i ranjene.
JA: E li vam je bile žal nedužne ljudi teri su tak stradali?
M. VEČEK: Ja sam te mam i tam rekel. Ja nijesam nikdar nikakvoga zla napravil. Same sme pervi dan da sme bili došli nutri polovili kokoši kej sme si spekli – te sme, bume rekli, pokrali, eli drugač nijesme dirali …
JA: Kakve ste imeli oružje?
M. VEČEK: Manlihere na pet metke. Ja sam bil kapral, a kaprali su imeli same pušku i noš. Nas je jake pune stradale, jer su oni imeli bolje oružje. Pri nas se govorile da se je kapetan naše artiljerije strelil, jer je h njegove baterije tak pune ljudi ginule. A Serbi su bili topniki kakve nije bile moči najti na berzu ruku. Oni su pucali i na jednoga čoveka. I gda sme one bili h Kolubare vode, najemput nas kapetan zazove van z vode, onda sme morali mašijerati cijelu nuoč, tak da sme k jutru došli na onije brijeg gde je bila glavna vojska. Onda sme gere morali pokleknuti i moljiti «Otec naš» i «Zdravomarija» za pervoga zmed nas paloga junaka.
JA: E ste videli i spominali se z serbski zarobljeniki? Kak se njim videle?
M. VEČEK: Je, je, videli sme je i spominali se z njimi. Eli te ti je se zlo, veljike zlo … Mlajši još nijesu bili tak hudi kak stari. Stari je po tebe pucal gde god, ze sije strani … Oni se tak duge ne predajeju dok god glavu nosiju.
JA: Kakve je tehnike bila na samom frontu? Alti, avioni?
M. VEČEK: Alte nikdar nije bile na frontu, a avione sam videl same jene par pudek. Oficijeri su dohajali na konje, tehnike ti nije bile nič ili jake male.
JA: Kak je bile gda ste bili ranjeni?
M. VEČEK: Došel sam Bijelu Cirkvu h bolnicu. Tam je bila jena Švabica tera je znala ljepe po hervacki govoriti. Ja sam se hpustil da sam dečke, pak sme se tak zafrkavali i šaljili. S tu pucu sam se jake ljepe spoznal i ona me je dobre dvorila. Jenoga dana ti ja pišem k Božiću dima list. Ona je došla kej ju nijesam čul i stala mi za pleče. A ja sam pisal svoje babe list. Ona je te vidla, prijela me za ramu i stepla i rekla da ja sejene imam babu če se izdajem za dečka. Onda me za čas došla pitat e bi ja rad išel dima za Božić. A gdo rajši kak ja! I pokljem toga je nazaj došla i rekla da se morem pakuvati za Zagreb. Onda sam ju prosil da naj te napravi i za mojega Franca z terem sam ja skupa služil. I ona je napravila.
JA: Kak je te bile s zelenem kadrem, o bekstvu z vojske. E li je te zbilja bile tak opasne?
M. VEČEK: Od kraja je te bile jake opasne. Pokljem več ne tak jake. Nektere češke trupe su znale cijele prejti i prebeči h kader.
JA: Gde ste bili pod kraj rata?
M. VEČEK: Pod konec rata sam bil h Zagrebu, a sam kraj rata me našel doma. Glji onda sam bil na urlabu.
JA: Kakve su bile prilike na kraju rata?
M. VEČEK: Ja sam imel onda troje dece, a sijeh skupa sam ih imel deset. Prije rata sam imel same tersije. Te je bile 900 klahtre. Z rata sam donesel 700 forinte i te sam dal Kersniku za njegvu njivu.
JA: Gda ste se oporavili h gospodarstvu?
M. VEČEK: Gda sam došel z rata, onda sam gospodarem pokosil se tranike i posušil su kermu. Oni su obećali da bum delal pri njih z dijela. Šteli su me za vinceljera, a mene je bile strah prijejti se toga posla, jer je tersije bile veljike, a nije se nikak mogle dobiti težaka. Onda su i drugi put poručili po me i tak su me duge hmatali dok nijesam pristal. I tak sam si male popravil gospodarstve. Prodaval sam gospocku detelju na licitacije, a navjek sam tak delal da je i mene nekej ostale, da sem imel nekakvoga profita.
JA: Gda ste se začlanili h gospodarske društve i kak ste se počeli baviti z politiku?
M. VEČEK: Mam 1918. sam se prijel obdelavanja tersja. Jen dan sam došel z Tomašem h Sveti Križ z kolami po brane. Zeli sme brane i naklali je na kole. Tije dan su glji bili izbori za odbornike. H jenom kupu je stale jene deset najbolje muži. Ja sam došel med te ljudi i pogledal papijere tere su imeli i na tere su predlagali odbornike. I gda sam spazil koga su predložili, hitil sam paperek naklu pred nje i rekel: «Kej nema h cijelom selu poštenejšega muža za odbornika, neke navjek morame imeti nekakvoga tutora i dotepenca!» I prešel sam hud kej kača k Tomašu na kole i otpeljali sme se dima. Poklje poldana dojde moj stric Imbra i velji mi da sam ja zebran za odbornika. Ja sam nije veruval. On tverdi da je i je. I tak sam došel na pervu sednicu. Tam sam se spoznal v Valjefcem, teri je poznal Mačka i Košutića. Ščem sme se mi spoznali, mam sme počeli delati za Seljačku stranku. On je z Zagreba donašal letke i daval mi je po skrivečki h jene huste ober pečine. Ja sam pak po noči raznašal letke po cijelom selu. I tak sam se počel s temi stvarjami baviti. Hodil sam i h Zagreb po tom poslu.
JA: I zdej … gda ste te se preživeli … kak vam je zdej?
M. VEČEK: Slabe, još furt trošim lijek. I babe mi je iste zlo.
JA: Kakve su vam hižne prilike?
M. VEČEK: Dobri su mi i deca i snehe. Hnuki rasteju, poštivaju me, ne mrem reči. I sega imam pri hiže, sega. Imeli sme dvije mesare, imam masti pune banje. Bral sam 12 hekti i nič nijesam prodal. Se se doma potroši. Se bi bile, veljim ti, ne bi nikomu h cijelom kraju bile ljepše nek nam, same … same da mi sin Viktor ne pije … Imam i penes, prodajem jabuke; na jenom juncu sam zaslužil pedeset hiljade. Nič mi ne falji. I Viktor dobre služi … same kije ne bi pil …
JA: Hm … tak je te, tak, kej morete. Borme sme se dosti prespominali. I su koruzu sme zružili. A gda bute imali cajta, dojdete k nam kum! Bume se pak spominali. Bute došli na spominjek, kej ne? Več se mrači vunje i zvoni … Fala vam za vine, kum … i za spominjek … Fala vam za se kej ste mi povedali …
I dok se Zdravomarija svojom jednostavnom limenom zvonjavom razlijevala obroncima i po tko zna koji put vabila večernje molitve mojih Komoršćana, odlazila sam polako, laganim korakom, bojeći se da ne probudim goricu i raspelo koje je moj kum sagradio od kamena iz svog trsja na blatnom lapornom raskršću.
Iz knjige “Svetokriški kajkavski zapisi” naše suradnice Verice Jačmenica-Jazbec koja sadrži sjećanja i kazivanja njezinih roditelja Marije rođene Kranjčić (r.1924) i Stjepana Jačmenice (r.1920), a koje je ona zapisala 1965. godine. Hvala Verici na ovom daru!