Si naši godi počimljeju od Mladoga ljeta, a saki god ili veljiki ili mali donese pune veselja h našu hižu.
Za Mlade ljete se hiža mora najljepše obrediti. Čak se i pobjelji, a počisti se saki kut, zmete dosti male saki tram, kej bi hiža bila ljepa da ju dojde gospodin župnik blagosloviti.
Za Tri Kralje na post se ide h Sveti Križ po blagoslovljenu vodu. Nju zvonar postavi h jen škafec krej cirkvenoga zida, a deca z babicami dolaziju z flašicami, tere su največ od sakojačkoga lijeka i zajemljeju blagoslovljenu vodu. H večer se peče kruh, a hu tom toga se mora napraviti i jen mali hljepček za blage. Po brijege se zestaneju muži i huškaju, jer dokič god se čuje huškanje, tud ne tuča curela. Za Tri Kralje se ide k Mihovljane na proščenje. Tam se kupuje temjen za nakaditi hižu, a starci navjek kupiju dece kruh talijan de je posipan s kuminem.
Na Jentonove je pri nas h Svetom Križu proščenje. Tije dan su muži i babe cjeli dan pred oltarem svetoga Jentona i moljiju za bolju sreču pri blagu. Na dar doneseju na oltar bunceke, klobasice i klase koruze. Hnogi dečke si tije dan najde pucu. Če mu se tera dopada, on stihoga dojde njoj za pleče i z krajdu, teru saki dečke ima z suobu, ju potegne i zaštrajfa po kaputu. Ona zate ne sme nič znati. Tera god ima štrajf po kaputu, za tu se zna da je zebrana.
Na Svječnicu se ide k veljike meše. Tije dan mora saki čovek imeti z suobu svječu. Svječe se h cirkve tri put hvužižeju i hpuhneju. Da se zadnji put hvužgeju, onda se složi prošecija tera ide oko cirkve. Gda mešari dojdeju dima, onda se ovak dela: jene družinče mora stati pod tram. Zeme mu se jena truha lasi teri se hvužgeju z blagoslovljenu svječu. Onda se mora tri put prejti oko človeka i na kraju svječu pritisnuti h tram i hgasiti. Mora se dobre paziti kam ide dim od hgašnjene svječe. Če ide k stolu, onda buju na hitrom gosti, a če ide k vratam, onda bu na hitrom smert pri hiže. Ta se blagoslovljena svječa mora dobre spraviti, jer se nuca, česa Bog ne daj, da bi nešči hmiral, onda mu se da goreča h ruke.
Gda dojde Fašnik, mačkari sprejdeju saku hižu h selu. Sigde dobiju krafline, a negde i tere jajce. Gazdarica je zna prositi da naj jake tancaju, kej je bu repa depša zrasla. Na Pepelnicu pak hodiju pepelnjaki teri imaju z suobu perut i pozmeteju se kahle oko peči.
Onda počne Korizma i Križni put. Na veljiki četertek se zavežeju zvoni, a na Veljiki petek babice vodiju malu decu gledet Božjega grobeka.
Na Veljiku sobotu se ide k večernice. Onda je veljika prošecija. Četiri muži nosiju «nebe», a pod «nebem» je velečasni teri nosi šakrament. Prije je prošecija h Svetom Križu išla do baronovoga grada, pred farof i h cirkvu. Dok god prošecija ide, zvoniju si zvoni, a gda se dojde h cirkvu, onda prestane zvoniti i ljudi mam zapopjevaju: «Tebe Boga falimo».
Na Vuzem se nosi kruh na blagoslov. Od sake hiže ide jene družinče z košaricu h tere je strošek, teri se još h sobotu mora speči. H cirkve se ljudi postaviju h dva rede i rezgerneju hadrice z košaric, a po sredine ide velečasni z kadilnicu i blagosljivlje. Dok još velečasni nije gotov, ljudi več nahrupiju van z cirkve i počneju bježati dima, jer teri prije dode dima, tije bu prije okopal koruzu, da bu mu za okopatvu zrasla. Nekteri znaju dojti dima si švicni i hmujeni, tak da nikak nemreju povedati kakva je bila prodika. Družina tera doma čaka mora zagristi od sakoga komada stroška teri je bil na blagoslovu.
Na Vuzmeni pandeljek se ide na Klupce na proščenje.
Pokljem toga dojdeju Trojaki, tere največ pamtiju deca zbog trojački črešnji tere su glji onda zrele. Zbog tije črešenj zide največ i svade med susedi, jer nema gospodara teri bi tak mogel ograditi svoju ranu črešnju da ju susedovi dečeci ne bi prije njega obrali.
Gda dojde Tijelove, onda se mora iti h hustu i tam se posječe tuljike majki, kuljike gospodar ima stanja na dvorišču. Pred hižu se zapiči največa i najljepša majka, a druge se deneju pred štalu, kočak, kljet i prešnicu. Na majke se navežeju pušljeki od ivanjčic i majčine suzic.
K Vidovomu se ide k Svetomu Vidu na proščenje. Gere ljudi zbavljaju zagovore za zdravlje oči klečeči po gola koljena. Na dar se pak nosi po jeden ili dva pare pišance. Deca se Vidu največ veseliju zbog črešenj i bebic. Medičari već h dodne zvažaju h brijeg medicu i licitar, lonjčari dopeljaju lonce, peharce i medenice. Postavljaju se štandi i peči za beršljine i klobasice. Babe z košarami punemi črešenj poštantaju se prek oko cirkve. Ze sije strani je same čujti decu kak cviliju, fučkaju, piščeju, jer je za kupiti sakejačke fučkalic i igrački. Dečki pucam kupujeju bebice i serce od licitara i peljaju je na ringljišpil. Puce se ot kraja čitiju, a onda nazadnjič prejdeju pod šator de z dečki jeju klobasice i spominjaju se. Na tije dan se zestaneju rođaki teri se cijele ljete nijesu videli.
Za Petrove se ide h Orehovicu na proščenje.
Za Marenje ide naša svetokriška prošecija na Terški Verh, a na farne cirkve tak duge zvoni, dok prošecija ne dojde h Krapinu. Cijelem putem se moliju i popijevaju svete pesme.
Pokljem toga se jedva čaka Božje lice, jer si za tu dobu puce moraju zešiti nove rubače i šurce za proščenje. H pol noč na petoga kolovoza je meša h farne cirkve. Da meša mine, dojdeju mužikaši, a ljepe opravljene puce primeju barjake na terami je našite Serce Isusove. Saka baba ima na glave košaru z stroškem, a h sake košare je pušelj žuteh rož i pisane trave.
H kufre i kej kakva škatula se nosi pamučina i beljina h teru se puce preslječeju da dojdeju na Bistricu i hu čem ideju h prošecije. A snehe i babe neseju h kufre rupce, tak da imaju za k sake meše drugi rubec na glave. Gda plehari zaigraju: «Rajska Djevo, kraljice Hrvata», si ljudi počneju popijevati i prošecija krene prema Bistrice. Onem teri su doma ostali, a najbolje pucam, če je tera morala ostati paziti na hižu, curiju suze kej deš, i saka velji da več ne daj Bog Božjega lica kej ne bi ona išla na Bistricu. Onije pak ljudi teri su same došlji spratiti svoje hižne do pijaca, ostaneju tak duge pred cirkvu, dok je još čujti pesmu od romare.
Da dojde Veljika Meša, onda je proščenje na Radoboje i na sije druge strani.
Na Malu Mešu se velji da Majka Božja deli grojzdje male dece teri su pomrli. Ak pak mati, tere je hmerle male djete, zoblje grojzdje prije Male Meše, onda njejnje detece ne dobi h raju grojzdja od Majke Božje.
Za Sesvete baš nije veselji god, ali se čovek sejene veselji če more ljepše nakinđati grobe od svoje familije. Na Sesvete pak h večer hodi zvonar od hiže do hiže i sigde mu daju po liter vina. A prek noči je morati na stolu ostaviti punu kupicu vina, jer po noči dolaziju duše pit. Če je cirkva veljika i ima cintor, dojdeju mužikaši i igraju za pokojnike.
Ščem prejdeju Sesvete, berze dojdeju zernice i božični tjeden, a onda je največa briga da se bu mesarile, kej bi k Božiču bile kej za deti h zube. Na Božični post se h večer kinđa luk, pospravi se cijela hiža, si teri ideju k polnočke se preslječeju, a skere saki pri hiže ima bar nekej novoga na sebe. Božični svetki su najljepši h cjelem ljetu i morti baš zate tak berze prejdeju. Dok se zbavi Štefanje i još teri godovnjak, dojde nazaj Stare ljete i se ide nazaj znovič, kak i lani …
Foto: By Avrankovic972 – Privatna zbirka autora Avrankovic972, Javno vlasništvo, https://hr.wikipedia.org/w/index.php?curid=227496