Nešči bi mislil da je ljehke biti doma z živinu, z kvočkami. A je! Ž njimi je još kakvoga posla! Perve je te da gda se nasaja, da se kvočke moraju deti h takve meste gde im je mir. Ne sme biti jena blizu druge, jer se puntaju. Najbolje je deti jenu pod komin, jenu pod špampat, a jenu makar i h zapeček.
Perve dane je dobre na kvočku deti rešete ili site dok se privadi. Pod nju se najprije dene same jedne ili dvije jajce za probu i če bu jajce s kljunem vljekla pod se, mam je znati da bu dobre sedela. Onda se drugi dan te jajce zemeju i donese se cjeli nasad. Te je sedamnajst ili devetnajst jajec i tulike jih najljepše opsedi. Dobre je pak nasaditi dvije kvočke najemput, tak da se pokljem pišanci deneju skupa i se jena vodi, a drugu se nazaj more nasaditi.
Kvočke se moraju redovite puščati naklu zobat i pit. Ima takve tere nečeju zobati i same pijeju vodu. Od takve se pak nije nadati da bu zdržala tri tjene na jajca. Same je počne bljedejeti roža i sa postane ljehka, a gda zide naklu same visoke zdiže noge i navek je sa zaberbrana. H takve prilike se mora skosati beloga luka i h vodu deti male vinskoga octa i te je dati da pije. Če pak i dalje sedi na jajca, mora se gazdarica berze pobrinuti za drugu kvočku. Če druge kvočke nema doma, naj skoči med babe h sele i saka bu je rada dala gda zna kakve su te zloče. Hnogi se pak put dogodi da kokoš tak na jajca i hcerkne, a cjeli se nasad poništi.
Pure su nabolje kvočke. Rane zneseju i mam sediju, a pod nju je moči deti i dvajsati njejne jajec ili petnaest purine i deset kokošine. Pura na svoja jajca sedi četiri tjene, zate se kokošine jajce moraju podeti osem dane kesneše, kej se skupa valjaju pureki i čučeki.
Guskine i racine jajce se iste valjaju za četiri tjene, guskine je dobre deti pod puru, eli racine nije. Racine su lušine tjenke, pak ih pura ljehke podrobi.
Najbolje je nasaditi tak da se nikakve pišče niti mladinče ne zvalja h svibnju. Veli se: svibenjske pišče, ljetna sneha i zimski pes ti je furt na pragu ili ga hraniš ili ne hraniš.
Gda se mladina spovalja, onda je prava briga sake posebne hraniti. Čučekem se perve dane da jesti kuhane jajčeke skosane na drobnom. Purekem je pak morati dati kuhane koprive zmiješane z sirem i z koruznu melju, i se te z mljekem privuriti. Pureki se moraju hraniti same z ruke. Žugicam se mora skopati germec ledinice z zemlju i te im dati pod stol kej si one same cubaju. Da se jemput stopi vrijeme, se sa živinica pusti z hiže van. Jezuš, Marija, kakva je stoprem onda briga s tem! Furt je te morati imeti na oku. Kvočka najrajši pelja pišance h gnoj. A pokljem toga mam počneju zjehati i kihati i napraviju im se červi h dušniku.
Te se da ovak pomoči: Zeme se jene pere od peruti ili repa i odčehne se z jene i druge strani, tak da na verhu ostane same mala keca. Te se namoči h oljeju, piščetu se otpre kljun, nategne se jeziček i porine pere h dušnik. Z njim se vrti i potegne van, a na peru tri, četiri živi červi. Pripeti se da pišče mam hcerkne, eli tere preživi počne mam zobati. Pureki nikdar ne kišeju. Eli da im se glavice brijeju, ne sme na nje opasti niti kaplja deža. Na te je morati paziti kej oke h glave. Žugicam ne škodi nič druge nek da bi negde našle čik i pozobale. Mam su gotove. Onda je morati voditi i brigu da jih vrana ne zeme. Sraka rada pobira racice, a vrana zeme se kej je god dojde pod perut. Gazdarica mora saki čas zakričati. «Pu hej» i z rukami stropati.
Gda živina male podraste i če je blizu huste, onda pak zna i lesica tere mladinče odnesti. A dogodi se da h jesen dojde pred kočak i lesjak «na dvije noge» i zmeče h vreču živinu. Negda prejde srečne, a negda ga počaka gospodar. Gazdarica već po ljetu mora znati kej bu za poklati, a kej za plemen i za prodati. Prije se je morale ščem več mladine prodavati, kej se je mogle doložiti za štibru.
Piščenjar je znal dojti h sele z svoju «trokatnicu» i zakričati e li ima mladine za prodati. Starci veliju: «Deca berže lovit čučeke», a mi bež za njimi i same se je čul krič kak sme je lovili pod kočakem, za koružnjakem i sikut kut su se skrili. I sam je piščenjar pomagal loviti. Jemput je tak gli hu tu dobu došel i pek s kruhem. Koš je del naklu i pomagal loviti. I dok je on bežal za piščetom, za toga su mu deca zeli štrucu z koša i bejži ž nju h koruzu. Tam su se častili, a stareši su same dalje lovili pišče po dvorišču.
Mladinče se je doma zaklale same onda da je bil orataj, da se kerma vozila ili k velikomu svetku, a i onda da su došli kumi. Živina se na selu navijek mora pričuvati, jer se nikdar ne zna kej se more pripetiti, pak se bu nucale. More tera baba roditi, pak se mora dati kokoš. Ide zetica zamuža i pak je morati dati.
Za plemen se je navek ostavljala najljepša mladina i te po dvajseti kokoši i kokota. Kokoši je najbolje ostaviti sakejačke: bjele, žute, crvene, grahoraste. Takve su najbolje nesice i na pretuljet su najraneše kvočke.