Kositva

0

Pri nas prava kositva počne od Vidovoga i traje do kraja lipnja. Onda se nič druge ne čuje nek kak ze sijeh strani muži klepljeju kose i spominaju se da peju kosit.

Moj deda je bil dobil pet kosce i rekel im je: «Dečki, hčem se bu počele luniti dodne, mi več morame biti na traniku». I da su bile dvije vure, deda je več čakal na traniku. Se je bile prirejene – kose su bile oštre kej britve, vuderi nalejani z octem, brusni kameni donešeni …

Mali klepači...
Mali klepači…


Deda je najprije prenašel mejaše. Onda se morale preklačiti, kej kosci ne bi pokosili kej lucke. Trag je moral biti raven kej da bi z puške strelil.

Bile je još kmene, pak se je z se strani čule same larmanje i spitavanje: «E si našel mejaš, im bi tuj negde moral biti, če ga nije nešči spuknul!» Kosci su si male pogutnuli rakije i stali za žlak. Jemput su prekosili, a onda su več počeli dohajati i drugi kosci. Megla se zdigla i počele se deniti i stoprem se onda videle kulike je kosce bile po tranike. Čule se kej kakve parade i smjeha, povijedali su jedni drugem kak su bili mladi, kak su k pucam hodili, kak su h ratu i h vojske bili.

Oštrenje kolcev za gorice...
Oštrenje kolcev za gorice…

A če je teri siromak kosil sam na svojem traničecu, on je furt same brusil kosu i zgledal se e li mu baba nosi froštukelj. Da je pogrele sunce več nije nikomu bile do smjeha, kosci su počeli zjehati i naslanjati se na kose. Još je bil same jen žlak za pokositi, eli več nijesu mogli, neg su seli i čakali froštukelj. Da pak je babica poluknula krej respela na brjegu, mam su ju spazili i išli delat mesta de buju sedeli. Za froštukelj se je jela reska župa na klobasica, suhi sir, pogačica na taracu pečena i vine. Muži su se dobre najeli, još su si male počinuli, a onda su i zagundrali:

Stal se jesem rano v jutro
malo pred zorju,
zestal jesem djevojčicu
z vrta šetajuč.
H ljevoj ruki grojzdek nosi,
h desnoj rožmarin.
Podaj meni djevojčica
da si podišim.
Ne dam, ne dam, dragi junak
jer sam žalosna.
Snočka sam se zaručila
s kim mi volja ni …

Jesenski posli - lupitva.
Jesenski posli – lupitva.

Pokljem je saki hrezal još po jeden žlak, onda su deli kose na rame i prešli dima. Babica pak je ostala restepati plaste i sušiti. Doma je dece dala navuk kak naj hraniju živinu i paziju na dom.

Do poldana je dva put pretepla, a popoldan je zazubljala i djela h kopice. Če je drugi dan bile vrijeme za kermu, kopice su se morale nazaj rastepsti. Moj deda je još doma bil rekel jenomu dečecu Štefeku da ob jene vure mora biti z kolami na traniku, a če bu išle gerde vrijeme, onda naj dojde još i prije.

Stari zanati...
Stari zanati…

I zaistinu su se počele prevažati megle po zraku i bogi je dečec žurel obrediti kole i iti na tranik. Hu tom toga je pozabil oplesti žert, pak ju je same del na kole i genul prema Radavečkove huste. Da je došel h brjeg, žert je stihoga spuzela i opala naklu, a da on toga nije čul, niti videl.

Jesenski posli...
Jesenski posli…

Vrijeme se več počele jake buriti, kerma je čakala suha h grede, a deda je bil jake jadoven kej dečeca tak duge nije. Babica je počela slagati velike kopice, a hu tom je došel i Štefek z kolami. Da ga je deda zagledal, prijel se za glavu i zakričal: «Jezuš, Marija, im nijesi dopeljal žert!» Dečec se branil da ju je del na kole, eli da ne zna de ju je zgubil. Deda veli: «Tihe, niti ne čmergni, kej je mene briga da si ju ti del na kole, kad ju nijesi sim dopeljal». I dok je babica nakladala na kole, deda je skočil k susedu posuditi raženj meste žerti. Da je se bila gotove, mali je gonil krave, a deda je deržal voz kej se ne bi prehitil.

Deca z Belca...
Deca z Belca…

Babica je naprej prešla dima, a h dvorišču nije znala česa bi se prije prijela delati. Živina je sa bježala lačna pred nju, svinje su kruljile h kočaku, a dosti male se je i maček brusil h noge. Deca su doma napravili sakejačkoga kvara, a nič za hasen. Babica je berze stukla par jajec i napravila šalatu, kej je deda imel kej pojesti da je došel z vozem. Pokljem su deca mam skočili na štalu prijemat i gnjest kerme, a deda je metal. Na štale je pak pod črepem bile vruče kej h peklu, a kam se god človek obernul, tam se je jeknul h glavu.

Bajanje...
Bajanje…

Još je bile za hititi same jene tri pahlje, da je počel prepadati deš. Da sme pak zadnji pahelj pospravili – je hvudril deš kej prutje. Nijesme htegnuli niti kole pospraviti h sušu, jer je najemput dotekla takva bujica h dvorišče da je prehitila ljesu i donesla veljiki namel.

Peljanje mlade v zamuš...
Peljanje mlade v zamuš…

Deda je te se gledel i rekel: «Im vište, deca, da sem ja čutil od jutra da bu bura. Zate je bil takev spar, da je z mene same pot lopotal i curel».

Foto: Fotografije s manifestacije Pajdaško sprehajanje 2015. (izvor: http://www.radio-zlatar.hr/go.php?go=foto&gal=28)

Ostavi odgovor

Vaša email adresa neće biti objavljena.

This site uses Akismet to reduce spam. Learn how your comment data is processed.