Tersje

1

Tersje je počne obdelavati od onda gda se počne seči kolje. A te je h veljače. Kolje se posiječe i zmeče na male kupe i tuj se opšrota. Onda se se znosi na jen veliki kup de se skljesti i objelji i podoštri. Zbrojiju se mere i složiju se med četiri kole na kup i odozgora se hiti beljinje. Tuj gotove kolje čaka dok dojde red da se ide k tersiju. Onda ideme rezat. Jene pet muži jen dan obreže, a deca drugi dan pobereju rože i znosiju na brijeg. Kolje se zvozi k tersju i ostavi na brijegu. Rane h jutre, još h dodne, ideju po tri, četiri ljudi h tersije spukati i podoštriti stare kolje, a drugi dan se kolji.

Kolje

Dobili sme dvanajest koljiče za koljiti, a ja sem z babicu kolje prinašala po tersiju i pobirala hezline i prekuljinje i se sme te metale na kupce. Koljiči su došli si i ni jen nije hkanil. Ščem su počeli koljiti mam su zapopevali:

«Zorja je zorja
bjeli je dan …»

Mene su japek mam poslali dima po rakiju kej si buju muži male gutnuli i kej bum mameku povedala kulike jih je, da bu znala obed za tulike ljudi skuhati.

Obed

Mamek je napravila dosta i obed je bil fini. Spekla je šest medenic dobre sirne štruklje i skuhala suhe mese z ječmenu kašu. Mesa je narezala punu zdelu, a štruklje je se složila h jenu medenicu, a z drugu je podveznula tak da buju još toplji. Kruh i se kej je treba od posude je složila h korpu i natočila dvije pletenjke černoga vina. Onda je zazvala jenu našu susedu i rekla je: «Janek, dej ti odnesi obed koljičem, a pucica bu nesla vine. Ljepe te prosim, kad ja ne morem, im ti znaš da sam bila na operacije na želucu». I ta strina mam veli: «Bum,bum» i bila je jake vesela, jer je med koljiči bil njejnji, bume reklji, šoc ili pak človek teroga je ona rada imela. Mamek joj zdigne korpu čiste punu hrane na glavu, a ja zemem vine i mi prejdeme v brijeg.

Kad sme došle h tersije ona je zagledala toga svojega šoca i zahdjela se h jen kol i opala. Korpa je pljusnula po tersiju i sprehitila se je se do dropte, a ja pletenjke naklu i zgrabim kol i vudri po nje. Onda je priskočil i njejnji muž, prijel ju za gut i h ruka deržal vinjak, preklel ju grde i rekel: «Ti si zdej zadnji put obed prehitila. Ja te bum zdej hbil, ja znam hu koga si se ti zagledala i te napravila, nu i on bu još večeres svoje dobil». Ja gledim potrenu posudu i se zmerlezgane jele i počnem se plakati i bežim dima povedati. Da sam doma povedala da je Nentica obed prehitila, mamek veli: «Muči, sinek, nesla buš pogaču tera je spečena za južinu i još vina, pak buju muži zbavili, kad su videli kaj se je dogodile».

Tak je i bile. Najeli su se pogače i spili jene petnajst liter vina.

Janeka sme zvali Nentica, a njejnjega muža Nenta, a šoc se zval Peter. Nenta i Peter su se cijele popolne svadili zbog Nentice i obeda, teri je dišal po cijelomu tersju. Žureli su se i se je bile gotove, ali je saki još jenu kuču šiblja ponucal dok su se lucne sprivezali. Japek su koljičem dali dosta piti. Kad su bili gotovi i pri večere pita jih moj japek: «Kulike vam trebam platiti, dečki?» Jeni su reklji da nije treba nič platiti i da su njim japek pomogli z blahcem, a drugi su rekli: «Im si dosta kvaren kej ti je Nentica takev obed prehitila, pak ti neme još mi računali, nek se več bume drugde našli».

Kopanje i špricanje

Došel je red na kopanje. Skopali sme sami, bez težake i onda je bil mir do špricanja. Za perve špricanje sme nanosili vodu rane h jutre i namočili galicu, a h vudjenjku su japek špricali. Za druge špricanje se več morale male vezati, a za tretje, četerte i pete vezati i male pretrijebiti. Morale se paziti na plesnivoču, tak da se mam male posumporile.

Onda se prekapale, a gda se počele grojzdje meknuti največa je briga bilo na pure i kokoši, če je tersije bile blizu sela. K Veljike meše se več mogel grojzdek najti i pozobati. Da je bil deš, zrevali sme van vinsku posudu: vodrice, putu, škafce, brenjku voznicu, lagve i bedenj. Tuj se najpredi nabijeju obruči i ostavi na dežu da se zamače. Onda se zvručeje voda i soda i zakuhaju se brenjke i se se čiste opere. Dok se još složi preša i meljin, zatoga bu i branje.

Bratva (beratva)

I ide se brat. Na kole se složi puta, grešta, vedrice, brenjka voznica i male loja i bat za zabiti piljku. Mamek pak priredi jele: odojka, orehovu gibanicu, luka i staroga vina, kukuruznoga kruha. Te se se dene h logužar i na kola, a deca same brusiju gegače i jedva čakaju da buju išli brat. Pribereju se kumi i rođaki, onda se nakleneju krave, japek poišče bič i ideme. Kad dojdeme k kleti, onda tuj ostavime kole, a krave privežeme. Kad se počne brati ide jen brač čez tersije i zebira ljepše grojzdje i odreže par černe lucne i ak je teri ljepši kozji cec. Da je branje gotove, onda se to ljepe grojzdje nameče h korpe, obloži se z listjem i stihoga se na glave odnese dime. Pokljem, kad imame čas onda to grojzdje navežeme na preju i objesime h pelnicu ili na najže kaj je pokljem za malu decu jemati.

Brenjka i puta

Brenjku oberneme i počneme se od reda brati. Puta je bila mam nagreštana i puna i jeden jaki dečke je nosil pute i berze sme napunili brenjku. Jeni su išli s kolami dima, a drugi su brali h drugu brenjku i škafce. Teri je zadnji dobral, ti je grojzd zaderžal h ruke i spuknul z njega jenu jagodu. Tu jagodu je na četiri strani male razrezal i napičil na rozgu. I rekel je: «Dragi grojzdek, hnogi put si ti napojil mene, i zdej bum pak ja tebe». I onda je triput zahuškal i te se je znale da je branje gotove.

Doma sme deli meljin na bedenj i h vedrice sme nosili z brenjke i sipali h meljin i mam mljelji. A negda, da nije bile melina, onda su muži z nogami gazili grojzdje. Onda se podcijeja lit i meče se h veliki lagef, a preševina h brenjku. Preša se nabije i hu nju ide oko sedem vedric. Preša se čiste stisne i jene dva put zavesi, tak da se čiste spreša. Mošt se pospravi beli posebne i črni posebne.

Kljet i mošt, pa vine

H kljeti de je mošt mora biti tople da mošt točne otkipi. Na veljikom lagvu se mora h piljku zvertati luknja i hu nju deti šlafek, a na lagvu mora biti lonček z vodu i hu njega navoditi tije šlafek. Tak dok god mošt kipi h vode brbučka i tak se zna da je prestal kipeti. Če nije druge posude, trop se dene h bedenj. Gere se dene poklopec teri se zamaže z ilovaču i na te se nasiplje pijesek i s toga se po zime kuha dobra tropica rakija.

Do Martinja se pije mošt, a od Martinja vine. Vine se pretače oko sječnja i veljače. One droži se mam skuhaju i te je rakija kej rozalijuš. Brenjke h tere se vine pretače moraju biti čiste i točne zasumporene da ne bi vine premenile farbu. Pipa se mora mam deti na brenjku kej se vine ne bi jemale na šef i ljuhtale čez piljku.

Foto: Fotografije slikara Marijana Zanoškog.
O slikaru i njegovim slikama više pogledajte na njegovoj stranici OVDJE.

1 komentar
  1. Jasminka Šoštarić Vanjak kaže

    Lijepo je čuti taj dragi naš kaj.

Ostavi odgovor

Vaša email adresa neće biti objavljena.

Ova web-stranica koristi Akismet za zaštitu protiv spama. Saznajte kako se obrađuju podaci komentara.