Puca, snoboki i ženidba

Stari zagorski običaji pri prošnji i udaji kćeri...

0

Gde je god pri hiže pucic, tuj mati sirota spravi sake pere od mladinčeta. Još je i tera baba zna dati več hčehanoga perja i te same ona tera nema svoje dece. Tak se pribere za tri vanjkuše, a strožak se pak napravi z lupinja.

I tak, gde je god pucic pri hiže, ne vušči se speči niti jajce niti sebe niti detetu, jer se se mora spravljati za prodaju. Najprije se spravlja za najstarejšu pucku, a ona zraste kej da bi megnul. Zate je i morati dan i noč presti za stolnjake i rušice. Tak je i Katica bile berze zrasla i več je bila red materju.

Otec navjek ima druge brige: kakve se bu meste pucke htrofile, med kakve bu ljudi došla i de ne bu kruheka stradala. Jemput je on rekel matere: «Čuj, Katica je najbolja od naše dece, nju bume morali dobre nadeljiti da bu išla za muža». A gli je hu tom toga i mater nekej dobila do vuh da dečki spitavaju za njenu čer. I gda su jenu večer pjesi na dvorišču najemput jake zalajali, ona nije niti morala pogledati čez okne, več je znala da ideju snobočani. Same je zašepetala: «Jezuš, Marija, snobočani su tuj». I tak je bile.

Snobočani su pokučili na vrate, došlji su veselji, ze semi se zrukuvali, a Katičin je otec mam spoznal da je te došel njegev pajdaš z svojem sinem. Katicu je bile jake sram, kak je i red da pucu bude sram da je dojdeju snobočani f hižu. Ona se mam prešla preslječi h komoru. Mati je skočila na najža po rebre, a otec s peharem h kljet po piti. Večera je bila berze na stuolu, a da su se najeli i napili, velji dečkov otec: «Zdej, gda sme se najeli i napili morame povedati po kej sme došli pod vaš pošteni krov. Moj si je sin naštundijeral ženiti i zebral si je vašu Katicu.» Da je te on rekel Katica je još bolj počeljenela i nije se upala pogledati niti dečka, niti njegovoga oca. Njejni je pak otec mam rekel: «Dečki dragi, stoga vam ne bu nič.

Ona je još mlada i ne zna se one posle tere sneha mora znati, vi ste doma na brijegu i se je od vode morati h brijeg nositi, a ona je još slabička». Nu hu tom toga vidi on da je Katica počela nekej skunjkati, pak velji: «Sinek, če je tebe zaprav, i nam je dobre». Na te velji otec od te dečka: «Te je se dobre, same ti zdej Miške povije kej misliš dati, jer i te se mora večeres znati». Ovije pak velji: «Pune ne mrem dati, kad i sam pune nemam, a još su i dvije pucke za zamuža, neg se bume mi ovak dogovorili – dal bum ladicu i špampat, vanjkuše i hadre, kravu i njivu na Harčevom». Jožek, teri je trebal postati zet se hjavi: «A kej je z onem tranikem de se h lugu drži našega?»

Foto: osobna arhiva Z. Franc

Onda se otec reserdil, snel školjak z glave i hitil ga naklu, pokrvarel h licu i počel kričati: «Kej bi još i tranik dal, teri mi je potrijeben kej oke h glave?» Eli su snobočani reklji: «Če ne daste tranika, onda nije z naše ženidbe nič». «Ne dam i ne dam i ne dam», počel je rajiti stari, ali se berze hvuril gda ga je stara pozvala h komorku i rekla da ima pristati i da su te pošteni ljudi. Gda se je vernul rekel je same: «Nu gda je tomu tak, onda naj bu».

Katica se mam razveseljila i sela si je krej dečka i mam su se dogovorili da buju h sobotu išli na zapis.

Drugi dan se  h selu znale, kej se je god hu te hiže govorile. A se je znesla jena baba tera je videla da se pri Mišku duge svijeti. Ona je povijedala kak je skočila z špampata i hitila na premah stari jakljin, nateknula starogove cokmane i stihoga dohdijebala do Miškovoga okna. Stara se, velji ona, vrtijela oko šporhota i cijepala rebre, stari je tekal po vine, a Katica se vunje hmivala z korita. Još je povijedala kak se je stari bil posvadil z nakanjenem zetem radi hdobe, a največ zbog tranika teroga nije štel dati.

H sobotu se išle na zapis. Dečke je cijelu večer nabijal štuc teroga je nosil pod kaputem za saku siguru – če bi ga napali drugi dečki ili če bi mu duo zakričal «Au biks». Na zapis se pak ide tak da otec dojde z sinem, a mati z čerju. Hčem su zišlji z hiže van, seljani vudri huškati i tak se  huškanje čule ze sakoga brega prek do Svetoga Križa.

Da su zbavili zapis mam su pitali gospodina župnika da bi došlji na žamelj. Drugi dan h nedjelju su bili pervi put ozvani. Pri nas puca i dečke ne smeju čuti da se pervi put ozavaju, jer bi im se deca rodili gluhi. Puca pak mora jake paziti da za vrijeme ozova ne bi, ne daj Bog, pojela pečene purje jajce, jer bi je dijete bile šprikljaste kej jajce.I kak god  je cirkva bila puna ljudi, da su počeli ozovi, bile bi čujti muhu da je kihnula. Gda su babe čule da je i Katica ozvana, mam su se dvije po dvije dorijevale skup i rekle jena druge: «Jaj, jaj bolje da si denes dene štrik za vrat, neg kej njega ženi. Z njim si ne bu nič druge mogla priskrbeti neg pune dece». A druga je pak mam nadodala: «Kej nije pun svijet fejst puc, neg gli ona tera nije za njihovu hižu i njihov grunt».

Počele se priređuvati za gosti. Morali su najprije pobijeliti hižu z nutra i z van. Da su z vana malali, onda su deli male galice h vapne i tak su z plavem pofarbali pol metra od zemlje i jeden pedenj na širokom oko oken.

Mati je pripravila i povaljala hadre. A da se hadre valjdaju onda se več put meste kamena h korite dene kakve male dijete i te je onda za njega velike veselje. Več put zna dijete od valjanja i zaspati.

Puca mora prejti oko sije rođake i se pozvati h gosti. Onda je saka rođakinja da po rušicu ili stoljnjak, a saka i obeča da bu spekla pogaču. Fermanjska kumica je podsnaš, bratići su svati, a susedov dečec nese kokota.

Da se dojde po sulj, več se mora biti složene, hadre povaljane, a ručniki se tak slažeju da im je videti špice. Vanjkuši se hvežeju h rušice.

Onda se na dvorišču pije, a zet ide h štalu otkapčiti kravicu. Otec još da baril vina na put, počneju huškati i geneju. Pri dečku  mora biti obrejena  komorka  kam se deneju pucine stvari. Tam več čakaju babe tere kaki očeju pomoči pospraviti, a praf za praf dojdeju glet kulike je česa sneha donesla.

Foto: osobna arhiva Z. Franc

Na mladijenku se pak najprije dene pamučina, onda kinč, h ruke dobi jabuku i rožmarin. Gda pred hižu mužikaši zaigraju, mladenec mora iti h komoru po mladijenku. Ona pak mora prije neg on i zehne reči: «De si tak duge bil?» i onda se po tom zna da bu ona sigdje perva. Onda ju mladenec kušne. Za te vrijeme mora dever vunje se zrajiti koga god pri hiže imaju i kak mu je ime. Veljiki je zamer če se za teru staru tecu pozabi. Stoprem onda mu sekačica odriglja vrate. Onda se pribiraju pogačarice z nakinđanami korpami. One glediju tera ime ljepše crvene panjkljeke i bušpan. Po hiže je iste se nakinđane. Ober stola visi ljuster od bažulja, slame i panjkljeke. Na zidu je pribit ručnik i tam moraju sedeti same mladenec i mladijenka. Da mužikaši zaigraju, pogačarice počneju tancati, a ze sije strani zviraju mačkari f hižu. Gospodar onda zna reči: «Dečki, jete i pijte i tancajte, same mi najte kakvoga kvara napraviti». Oni veljiju: «Bez brige, kum».

Da dojde vrijeme za iti na zdavanje, dever mora spričati, a si po hiže vudri h plač. Još se same ima dar zebrati i onda se zeme rudne. Mladijenka mora imeti pri sebe male šenice, a podsnaš pak mora imeti pogačice. Da se zide van h dvorišče pak se si plačeju, a Katica sem velji: «Zbogom i najte mi kej zameriti». Svati zahuškaju, mužikaši zaigraju, pogačarice deneju korpe na glave i geneju.

Kud se god ide, pri sake ljese čaka kup bap i dece i sijem njem podsnaš delji pogačice.

Da su h cirkve zdani, mladijenka ostavi jabuku z rožmarinem na jentaru. Onda se vunje moraju dogovoriti teri je najkrači put do dečkovoga doma. Da dojdeju na pervi komad njegove zemlje, tam se pije rudne, nazdravi se mladijenku. Njoj daju punu kupicu h ruke, ona male spije, a druge hiti prek rame skup z kupicu. Onda još mora posejati šenicu i reči ovak: «Na ove zemlje nek navijek raste vine i kruh».

Več se z daljekoga čuje da deca kričiju po selu da ideju nazaj, a h dvorišču počaka sveker i pelja mladijenku h štalu. Ona mora pogladiti sake marše, a stoprem onda ideju f hižu. Na pragu ju počaka mati z nakinđanem kuglifem i z flašu vina. Ona kušne snehu i da je h ruke flašu i kuglif. Ona pokorači f hižu i velji: «Nosim vam blagoslova i Božjega mira». Onda još na kraju mora skušuvati se rođake i susede po hiže, oko peči i na peči, one teri oko žerva stojiju i glediju i se one teri nijesu stali f hižu.

Ostavi odgovor

Vaša email adresa neće biti objavljena.