Konoplje

0

Moja babica su sejali konoplje več ljet na jene meste, a tije komad se zval «H rupa pri tunjku». Kad su priredili za konoplje i posejali, te je bile tak drobne kej greda lukova. Onda sme mi deca napravili s kola kakti križ i deli najprije babičinu staru jajnjku i dedekov kaput gere i odozgor škrljak i te je bile strašile ke sme ga zapičili sred konopelj, da ne bi tiči seme znipali.

Onda, gda su zrasle, išli sme pukat belice posebne i črnice posebne kak ih je mogla ruka pri vrhuncu držati i te se zvala jena šaka. Tu šaku sme zavezali ober korenja i pod vrhunci, a onda sme na pjenju z širočku opsekli vrhunce i korenje. Zdej sme metali dvajseti šak skupa i delali tak močelnice. Saki pušelj sme čverste zvezali z bekovu tertu i priredili za namakanje. Močelnic je znale biti i po trideset, a negda i več.

Onda sme išli namakat. Dali sme na kole konoplje, jenu lotru, tri-četiri kljuke i jeden veliki pjenj i dva-tri koljeke, a te se se je nucale pri namakanju.

Došli sme h Pečinu i pušlje sme shitali h vodu i složili je h red i na nje deli lotru. Kljuke sme zahakljali za kljine i zabili h dno mlake i još gere deli pjenj tak da su močelnice točne bile h vode.

Za par dane su išli babica glet e su močene. I bile su. Si kulike nas je bile, berze sme išli snimat konoplje. Babica su se podkušali, stric Adam si je potferknul gače – i na posel.

Unutrašnjost zagorske hiže. Platno i odjevni predmeti na slici izrađeni su od konoplje.
Unutrašnjost zagorske hiže. Platno i odjevni predmeti na slici izrađeni su od konoplje.

Najprije sme spukali kljuke i vugnuli pjenj. Zeli sme lotru i konoplje su se zdigle na vodu. Razvezali sme pušlje i šaku po šaku prali i te tak da sme onu terticu ober korenja pri pranju omeknuli i ostala je same gornja zvezana. Da su konoplje bile oprane onda sme je prestirali. Te sme delali tak da sme pri doljnje strani raširili šake i zavili h krug da su ljepe se stale h vis. Tak su se sušile dok se njesu sposušile i takve sme je i dima prinašali. A još su se i doma na peči posušavale.

Onda su se tukle. Postavili sme tukaču i počeli. Za dva dane se je mogle se stuči, a tretji dan se terle i mikale na greben, a za fine povesme na jahlice. Te fine povesme je bile same, česa Bog ne daj, za koga skrizmati i popu dati da je s križecem došel.

Kudelje su se delale od onoga tere je ostale na grebenu, a čiste se je povesme po pet šak skupa zaferknule i te se zvala jena štruca povesma. Najprije su se prele kudelje i z njih je bila pasma dvanajšak i četrnajšak. Povesme se je prele čiste tejnjke kej lasi. Te je bile za jajnjke i fertune, stoljnjake, ručnike i hadrice i zvale se je dvajsetak. A dvanajšak je pak bil za rušice, žaklje, torbe za buče prešati, canjke za pri posude nucati i za onuče.

Po pet šmuljic se morale zmahati na muhale da je bila jena štrenja. Zadnja nit se je namotala na tri perste, ta se zvala kobilica. Čez tu kobilicu i čez štrenje se je navodil matvuz i zvezal da se nije mogla preja zmotati.

U donjem desnom kutu vidi se kolovrat.
U donjem desnom kutu vidi se kolovrat.

Onda su babica donesli paravnicu i hu nju nasejali pepel i nalejali vode, a onda sme i štrenje deli nutru. Da sme drugi dan zvadili kruh s peči, preje su išle h vruču peč. Te sme tak napravili da sme na lupatu deli stare canjke i gere zavili preju kej gibanicu i pokrili i sikut zamotali z canjki i deli h peč. Drugi dan su te babica zvadili z peči i deli preju h paravanicu i poljevali z kipučem lugem. Onda na korite i na mlaku prat.

Preja se štrenjkala na dva koljeka i ostavila da se suši. Pokljem toga z nju na vitel. Matvuz se razvezal i kobilica se razmotala i nit se navodila h dilidajec i namatale su se klupke. Kad je bile gotove hvijanje, klupke su išle na osnovače. Te se zvala osnova. Tuj je mešter videl po preje h teru pasmu ju mora deti. Vagnul kulike je funti i mam je znal kulike bu palic.

Kad je mešter zel naklu snutek osnovač, onda ga je splel kak kitu i babica su ga hvezali h stoljnjak i obesili na tram, dok se nije išle k tkalcu. Spekli su gibanicu i skuhali buncek i zeli poličnu flašu vina i koruznu melju za žlihtu. Te su se hvezali h cule, deli snutek na glavu i jednak k tkalcu. Tkalec se mam prijel posla, del strošek na stol, a snutek na premu. I babica veliju: «Tomaš, imam same jeden paklin pamuka, a druge buš preju po preju». A on veli: «Dobre Janek, kak god ti očeš. Gotove ti bu do druge nedjelje». I zaistinu je bile gotove. Da je trebale iti po platne nazaj je moral biti strošek: gibanica, mladinče i barilec vina i te se zvale likuh.

Platne je več čakale zavite i štruncelji zvezati. Na platnu je z vuglenem bil napravljen černi križ i te se je znale da je gotove. Babica su pitali: «Onda Tomaš kulike sam ti ja dužna?» On je rekel: «Penes mi ne buš dala, nek mi peš žejt i grojzdje brat». Babica se ljepe zafalji i dene platne na glavu i dima. Platne dene na stol i male si počine, onda nas se prizove dima i veli komu bu se kaj hrezale.

Kut za mužikaše.
Kut za mužikaše.

Najprije dedeku rubača i gače, onda japeku i mumeku, malom Štefeku i Marice i platne je porezane. Zdej mam babica ideju krojit rukavce, jajnjke, rubače, gače i berže šivat bolje i ljepše nek kakva mašina. Rukavce su tak našljinjgali i našili oko vrata, po persa i oko rukave da su rukavci bili kaj zmišljeni, a štruncelje su spleli i prišili pod ručnike. Na dedekove gače su napravili ljepe resice i splelji su svitnjak.

Onda je išle se gotove h parile, kej se je žlihta oprala. I nazadnjič se je povaljale i oblekle. Te su bili najveseljejši časi da sme h novom opravilu išli k meše i k Svetom Vidu na proščenje.

Foto: By Theodor von Hörmann – http://www.imkinsky.com/, Public Domain, https://commons.wikimedia.org/w/index.php?curid=562106

Ostavi odgovor

Vaša email adresa neće biti objavljena.